2 Minutes To Read

အစိုးရမဟုတ်သောအဖွဲ့အစည်းမှဝန်ထမ်းတစ်ဦး၏အမြင် ဒီမိုကရေစီသေဆုံးသွားသည့် အတွက် လူ့အခွင့်အရေးတိုက်ပွဲဝင်ရခြင်း

2 Minutes To Read
  • English
  • ဆက်လက်တင်ပြနေဆဲ ‘Chronicle of a coup,’ ဆောင်းပါးများ မှစေ့ဆော်တိုက်တွန်းမှုရခဲ့ပြီး , Damien Riley (ကလောင်အမည်)က အစိုးရမဟုတ်သောအဖွဲ့အစည်း NGO အနေဖြင့်  သူ၏အတွေ့အကြုံကိုရေးသားထားပါသည်။

    ယခုပို့စ်မူရင်းကို ၂၀၂၂ ဖေဖော်ဝါရီ ၁၇ရက်နေ့တွင်တင်ဆက်ဖော်ပြခဲ့ပါသည်။မူရင်းအင်္ဂလိပ်ဘာသာဖြင့်ဒီမှာဖတ်ရန်။

    (အယ်ဒီတာ၏မှတ်ချက်- ဤ ပို့စ်သည် Christopher Walker၏   ဆက်လက်တင်ပြဆဲ ဆောင်းပါး ”Chronicle of a Coup မှစေ့ဆော်ချက်အရရေးသားခြင်းဖြစ်သည်။မည်သို့ပင်ဖြစ်စေဆောင်းပါးသည် ကလောင်အမည် Damien Riley ၏ သီးသန့် ရေးသား ထားသည့်မူရင်းလက်ရာသာဖြစ်ပါသည်။ အခြားဆောင်းပါးရှင်များကိုလည်းမိမိတို့ကိုယ်ပိုင် အတွေ့ အကြုံများကို ရေးသားရန်တိုက်တွန်းအားပေးပါသည်။)

    “ဖြစ်လာနိုင်ခြေရှိသည့်အာဏာသိမ်းမှု့ကိုဆက်လက်စိုးရိမ်နေရချိန်တွင်မြို့တွင်းလမ်းများပေါ်တင့်ကားများကိုတွေ့မြင်နေရ”ဟု ကျွန်တော့်ကွန်ပျူတာဖန်သားပြင်မှသတင်းခေါင်းကြီးပိုင်းစာလုံးများကဖော်ပြနေပါသည်။ ထိုနေ့က ဇန္နဝါရီလ၂၉ရက်သောကြာနေ့ဖြစ်သည်၊နေသာသည့်ထိုနေ့လည်ခင်းတွင် ကျွန်တော်အိမ်က အလုပ်လုပ်နေရာမှ ဗဟန်းမြို့နယ်တွင် သံလွင် စိမ်းရောင်တင့်ကားကို နိမိတ်ဆိုးပုံရိပ်အဖြစ်တွေ့လိုက်ရသည်။ ထိုသတင်းလင့်ခ်ကို ကျွန်တော့်လုပ်ဖော်ကိုင်ဖက်နှင့်မျှဝေဖြစ်ခဲ့သည်။ လွန်ခဲ့သော ၅နှစ် အတွင်း ပြည်တွင်းရှိ အစိုးရမဟုတ်သောအဖွဲ့အစည်းတခုတွင် ကျွန်တော်လုပ်ကိုင်ခဲ့သည်။ ထိုနေ့ ညနေပိုင်းတွင် ကျွန်တော်တို့စီမံခန့်ခွဲမှု့လုပ်ငန်းပိုင်း ဆိုင်ရာZoomအစည်းအဝေးတခုကျင်းပရန်စီစဉ်ထားခဲ့သည်၊နောင်တွင် အမှားကြီးမှားသည့်လျှော့ပေါ့ပြောကြားချက်တစ်ခုဖြစ်လာမည့် “ဒါတော့စိုးရိမ်စရာပဲ” ဆိုသည်ကို ကျွန်တော် ကြိုတင်ရေးခဲ့သည်။ ။အမျိုးသားဒီမိုကရေစီအဖွဲ့ချုပ်(NLD)ပါတီနှင့်မြန်မာ့တပ်မတော်တို့အကြားတင်းမာမှုဖြစ်ပေါ်နေသည်မှာရက်သတ္တပါတ်အတော်ကြာနေခဲ့ပြီ ဖြစ်သည်။ ၂၀၂၀ခုနှစ်နိုဝင်ဘာလရွေးကောက်ပွဲတွင်စစ်တပ်ကိုယ်စားပြုပါတီများစိတ်ဓါတ်ပျက်ပြားလောက်အောင်ရှုံးနိမ့်ခဲ့ပြီးနောက်အခြေအမြစ်မရှိသည့်စွပ်စွဲချက်များဖြင့်ရွေးကေက်ပွဲမသမာမှုများကိုသာစစ်တပ်ကထပ်တလဲလဲပြောကြားနေခဲ့သည်။လာမည့်သီတင်းပတ်အတွင်းနိုင်ငံ့တာဝန်ယူတော့မည့်ဒီမိုကရေစီလုပ်ပိုင်ခွင့်များအပ်နှင်းခံထားရသော NLD အစိုးရအသစ်ဖြင့်ထိုတင်းမာမှုများမှာအထွဋ်အထိပ်သို့ရောက်နေခဲ့သည်။တင့်ကားများမြို့တွင်းလမ်းမပေါ် တက်မလာခင်ရက်အနည်းငယ်ကပင်စစ်တပ်ပြောရေးဆိုခွင့်ရှိသူမှ အာဏာသိမ်းမည့်အကြောင်းသတင်းထောက်များ မေးမြန်းသည့်အချိန်ကငြင်းကွယ်ခဲ့သေးသည်။

    သံသယတွေကိုမြိုချခြင်း/၂၀၂၁ ဇန္နဝါရီ ၂၉ ရက်

    ကျွန်တော့်အလုပ်တွင်ယခုလိုဖြစ်ပျက်မှုများကိုအနီးကပ်စောင့်ကြည့်ခဲ့ကြသည်၊အဘယ်ကြောင့်ဆိုသော်ကျွန်တော်တို့ဆောင်ရွက်နေသည့်လူ့အခွင့်အရေးဆိုင်ရာNGOအဖွဲ့အစည်းကိုထိခိုက်လာနိုင်၍ဖြစ်သည်။ဒီမိုကရေစီကူးပြောင်းရေးကာလတွင်အခြေခံလူတန်းစားများနှင့်ကျွန်တော်တို့ကွန်ယက်များတည်ဆောက်ခဲ့ကြသည်၊ထောင်ပေါင်းများစွာသောသူတို့အားလူ့အခွင့်အရေးအကြောင်းအသိပညာပေးခဲ့ကြသည်၊ဥပဒေပြုသူလွှတ်တော်ကိုယ်စားလှယ်များ၊အစိုးရအရာရှိများနှင့်ရင်းနှီးသည့်ဆက်ဆံရေးဖွံ့ဖြိုးလာစေခဲ့သည်။ NLD ၏ ဒုတိယသက်တမ်းတွင်လူ့အခွင့်အရေးအတွက်ကာကွယ်ပြောဆိုရန်ရည်မှန်းချက်ကြီးကြီးထားပြီးအစီအစဉ်ဆွဲခဲ့ကြသည်။

    ထိုနေ့လည်အစည်းအဝေးကို ကျွန်တော်တို့ဒါရိုက်တာပါဝင်တက်ရောက်ခဲ့ပြီးနေပြည်တော်တွင်ဘာတွေဖြစ်နေသည်ကိုကြားသိသည့်သူများထံမှသတင်းကိုအချိန်နှင့်တပြေးညီရရှိနေကြောင်းကျွန်တော်တို့အားပြောကြားသည်။စစ်တပ်နှင့်NLDအကြားဆွေးနွေးညှိနှိုင်းခြင်းမှာလည်းအလွန်အမင်းစိုးရိမ်ဖွယ်ကောင်းနေသည်၊လမ်းများပေါ်တင့်ကားများသွားလာနေသည့်သတင်းကိုလည်းပေါ့ပေါ့တန်တန်မယူဆသင့်ပေဟုပြောသည်။သတင်းအချက်အလက်များပိုမိုရယူရန်ကျွန်တော်တို့နှင့်စည်းဝေးနေရာမှသူထွက်သွားသည်။ကျွန်တော်နှင့်ကျွန်တော့်လုပ်ဖော်ကိုင်ဖက်များမှာစိတ်ဓါတ်ကျခြင်း၊မယုံကြည်နိုင်ခြင်းတို့ရောပြွမ်းနေခဲ့သည်။ အဖွဲ့အစည်းတစ်ခုအနေဖြင့် ကိုဗစ်-၁၉  ရောဂါပိုးကြောင့် မသေချာမရေရာခြင်းနှင့်  အနှောင့်အယှက်များစွာကို ကျွန်တော်တို့ကျော်လွှားခဲ့ပြီးဖြစ်သည်။ ယခုတဖန်ကံဆိုးမိုးမှောင်ကျလုဆဲဆဲအနေအထားမှာရောက်နေပြန်ပီလား၊ သို့မဟုတ်တင့်ကားများနှင့် အာဏာသိမ်းခြင်းအကြောင်းတီးတိုးပြောနေကြခြင်းသည် အပိုတွေပဲလား၊လုပ်ဇတ်တွေပဲလား ယခင်နှစ်တွင် ကိုဗစ်-၁၉က ဘာကိုမှလျှော့မတွက်ရန်ကျွန်တော်တို့ကိုသင်ခန်းစာပေးသွားခဲ့သည်၊ထိုကြောင့် အစည်းအဝေး ကိုရပ်နားလိုက်ရန်ဆုံးဖြတ်လိုက်ကြသည်၊ကျွန်တော်တို့၏ဆက်သွယ်ရေးကိုလည်းလျို့ဝှက်ဆက်သွယ်သည့်လမ်းကြောင်းသို့ပြောင်းလိုက်ကြပြီးငွေသားနှင့် အစာရေစာစုဆောင်းနေခဲ့ကြသည်။

    ကျွန်တော့်မိတ်ဆွေနိုင်ငံခြားသားတစ်ဦးကိုဖုန်းခေါ် ပြီးထိုညနေတွင်သူနှင့်ချိန်းထားသည့်ညနေစာစားမည့်အစီအစဉ်ကိုလည်း ဖျက်လိုက်သည်။ သူကမယုံတဝက်ယုံတဝက်ဖြင့်တုန့်ပြန်သည်၊ သူ၏မြန်မာလုပ်ဖော်ကိုင်ဖက်များလည်းထိုသတင်းနောက် ကိုလိုက်နေကြကြောင်း၊ အာဏာသိမ်းမည်ဆိုသည်မှာဖြစ်မလာနိုင်ကြောင်းသူ့ကိုပြောသည်ဟုဆိုသည်။ အထူးပြင်ဆင်ထား ရန်ကျွန်တော်ကတော့သူ့မိတ်ဆွေအနေဖြင့် အကြံပေးခဲ့သည်။ အကယ်၍အာဏာမသိမ်းခဲ့လျှင်နောက်နေ့ညနေမှာ ညစာ အ တူစားကြပေမည်။

    နောက်ကြောင်းပြန်တွေးကြည့်သော်၊ ဖေဖော်ဝါရီလ (၁)ရက် အာဏာသိမ်းသည့်နေ့မတိုင်မီစနေ၊ တနင်္ဂနွေမှ အမှတ်တရ များမှာယခုအခါတန်ဖိုးရှိလှသည်။ ထိုအရာတို့သည် ယခုကျွန်တော်တို့သိရှိခဲ့သည့်ကမ္ဘာကြီး ဂျွမ်းထိုးမှောက်ခုန်မဖြစ်မီကနောက်ဆုံးအခိုက်အတန့်များပင်ဖြစ်သည်။ ထိုအချိန်များသည် ရန်ကုန်တွင် ကိုဗစ်-၁၉ကြောင့်လပေါင်းများစွာပိတ်ထားရာမှ နေ့စဉ်ဘဝပုံမှန်အနေအထားသို့ပြန်လည်ရောက်ခါစဖြစ်သည်။ဆိုင်များပိုဖွင့်လာကြပြီးလူများမှာလည်း လှုပ်ရှားသွားလာရန် အတွက်အိမ်ပြင် သို့ပိုထွက်လာခဲ့ကြသည်။

    နေပြည်တော်ဆွေးနွေးပွဲများမှာမအောင်မြင်ကြောင်းသတင်းများဆက်လက်ကြားနေရသော်လည်းယင်းတို့မှာအာဏာမသိမ်းမီရှေ့ပြေးဖြစ်သည်ကိုကျွန်တော်ကမယုံနိုင်သေး၊ သံသယရှိနေဆဲဖြစ်သည်။ နောက်ဆုံးတွင် တတ်သိနားလည်သူဆရာကြီး များနှင့်ကျွမ်းကျင်သူများဝင်ရောက်ပြောကြသည်မှာ- စစ်တပ်သည်မိမိရေးဆွဲထားသည့်ဒီမိုကရေစီမပြည့်ဝသောဖွဲ့စည်းပုံ အခြေခံဥပဒေကိုချိုးဖောက်မည်မဟုတ်၊ထို့အပြင်ဒီမိုကရေစီကူးပြောင်းရေးနှစ်များကတပ်မတော်၏ထိန်းချုပ်မှုလမ်းကြောင်းကိုနောက်ပြန်မသွားနိုင်ရန်အပြောင်းအလဲများဖန်တီးလိုက်ပြီဟူ၏။ ထိုကာလများ၏အတွေးအခေါ် ကိုဥပမာအနေဖြင့် ပြရသော် အာဏာမသိမ်းမီတစ်လအလို Frontier Myanmar ကထုတ်ဝေသည့်ဆောင်းပါးတွင် ပါဝင်သည့်စာကြောင်းများ မှာ- “ယနေ့မြန်မာနိုင်ငံသည်အလားအလာအလွန်ကောင်းသည့်နိုင်ငံဖြစ်သည်။ ကျွန်ပ်တို့နိုင်ငံသည်ဆင်းရဲမွဲတေမှုနှင့် ပဋိ ပက္ခနွံတွင်နစ်နေသော်လည်းကျွန်ုပ်တို့တွင်အံ့သြဖွယ်ကောင်းသည့် အပြောင်းအလဲများကိုဆောင်ကြဉ်းလာနိုင်သည့် ဒီမို ကရေစီနည်းလမ်းတကျရွေးကောက်တင်မြှောက်ထားသည့်အစိုးရရှိနေပြီ” ဖြစ်သည်။

    ထိုနောက်ဆုံးတနင်္ဂနွေနေ့ဇန္နဝါရီ ၃၁ရက် ကုန်ဆုံးချိန်တွင်ကျွန်တော်တို့၏လုပ်ငန်းဆိုင်ရာအစည်းအဝေးမှတ်တမ်းများ ကို ပြန်သုံးသပ်နေခဲ့ပြီး သောကြာနေ့ကကျွန်တော်တို့မဆွေးနွေးလိုက်ရသည်များကို နောက်တပါတ်တွင်ဆွေးနွေးရန်အချိန် သတ်မှတ်လိုက်သည်။ ထိုညက ကျွန်တော်ပျော်ရွှင်စွာအိပ်ယာဝင်ခဲ့သည်၊ နောက်ပိုင်းတွင် ဗရမ်းဗတာတွေဖြစ်လာတော့မည် ကိုမသိခဲ့ပေ။

    ကြောက်ရွံ့ထိတ်လန့်မှုတို့မြင့်မားလာခြင်း/၂၀၂၁ ဖေဖော်ဝါရီ ၁ ရက်

    မနက် ၈း၀၀ နာရီတွင် ကျွန်တော်နိုးလာပြီး မနက်စောစောပိုင်းကတည်းကဝင်ထားသည့်ဖုန်းခေါ်ဆိုမှုများတွေ့လိုက်ရသည်။ပုံမှန်အချိန်တွင်အင်တာနက်စက်မှစိမ်းနေသည့်မီးကလည်းယခုနီနေသည်။ ကျွန်တော့်ဖုန်းဆယ်လျူလာဒေတာမှလည်းဘာမှဝင်မလာတော့ပေ။ဖုန်းလိုင်းပါပြတ်သွားပေပြီ။ ကျွန်တော့်တိုက်ခန်းတွင်း ရှိရုပ်မြင်သံကြားစက်ကိုဖွင့်လိုက်ပြန်တော့လည်း မီးရောင်စုံနှင့်ခြစ်ရာလိုအရေးအကြောင်းများသာပေါ်နေသည့်ရုပ်မြင်သံကြားလိုင်းများကကျွန်တော့်ကိုပြန်ကြည့်နေသည်။ နိုင်ငံပိုင်ရုပ်မြင်သံကြားလုပ်ငန်းဖြစ်သည့် MRTV မြန်မာ့ရုပ်မြင်သံကြား လိုင်းတွင်သာ အစီအစဉ်တစ်ခုကိုထပ်တလဲလဲပြနေသည်။ စစ်သားများနှင့် နေပြည်တော်တဝိုက်မြင်ကွင်းကျယ်ကိုနောက်ခံတီးလုံးနှင့်ပြသနေခြင်းဖြစ်သည်။

    အေးမြသောမနက်ခင်းမှာကျွန်တော်အပြင်ထွက်၊ဟိုသည်လျှောက်ကြည့်ပြီးလူစည်ကားရာလမ်းဆီသို့ဦးတည်လိုက်ပါသည်။ KBZ ကမ္ဘောဇဘဏ်ရှေ့မှာလူအုပ်စုကြီးကငွေထုတ်စက်မှငွေထုတ်ယူရန်စောင့်ဆိုင်းနေကြပါသည်။ လုံခြုံရေးအစောင့်မှ တန်းစီနေသည့်လူအုပ်ကြီးကို အင်တာနက်ဆက်သွယ်မှုလိုင်းမကောင်းကြောင်းပြောနေသည်ကိုကျွန်တော်တစွန်းတစ ကြားလိုက်ရပါသည်။ ဒါသည်ပင်ကျွန်တော်သံသယမကင်းဖြစ်နေသည့်အင်တာနက်ဆက်သွယ်မှုက နေရာတကာမှာဖြတ်ခံလိုက်ကြောင်းကိုအတည်ပြုပေးလိုက်ပေပြီ။

    အိမ်ပြန်ပြီး အင်တာနက်ပြန်ရမည့်အချိန်ကိုမသက်မသာစောင့်နေခဲ့ရသည်။

    နောက်နာရီအနည်းငယ်အတွင်းမြန်မာပြည်တဝှမ်းဖုန်းဆက်သွယ်ရေးပြန်ရလာသော်လည်းလိုင်းကောင်းတလှည့်မကောင်းတလှည့်ဖြစ်နေသည်။လုပ်ဖော်ကိုင်ဖက်များထဲကတစ်ဦးကကျွန်တော့်ကိုဖုန်းဆက်သည်။ နိုင်ငံတော်အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်နှင့် သမ္မတဦးဝင်းမြင့်တို့ဖမ်းဆီးခံရပြီး အခြားNLD ပါတီအဖွဲ့ဝင်များလည်းပါသည်ဟုသူနေထိုင်ရာတိုက်မှအခြားသူများထံမှသိရသည်ကိုကျွန်တော့်အားပြောပြသည်။ထိုစကားလုံးများကကျွန်တော့်ကိုအရှိုက်ထိသွားစေသည်။ ကိုဗစ်-၁၉ ကပ်ရောဂါဖြစ်ခါစသီတင်းပတ်များအတွင်းကလည်းကောလဟာလများပျံ့လွင့်နေခဲ့သည့်အဖြစ်ကိုပြန်စဉ်းစားကြည့်သည့်အခါ ကျွန်တော့်လုပ်ဖော်ကိုင်ဖက်၏အသံတွင်ထိုစကားလုံးများကိုသတိထားပြောနေမှန်းသိရသည်။

    ကျွန်တော့် လုပ်ဖော်ကိုင်ဖက်ရှိရာမြို့ထဲတိုက်ခန်းကိုခြေလျင်လျှောက်သွားပြီးအထပ်နိမ့်အုတ်တိုက် မှသူ့အခန်းဆီသို့ လှေခါး များအတိုင်းတက်သွားလိုက်သည်။ သူ့အခန်းမှာအင်တာနက်ပြန်သုံးလို့ရနေပြီဖြစ်သည်။ အင်တာနက်မျှဝေသုံးသည့်ဟော့စ် ပေါ့ ဖြင့်ချိတ်ဆက်လိုက်သည်နှင့် ချက်ခြင်းပင် ကျွန်တော့်စမတ်ဖုန်းတွင် သတင်းများနှင့် ဖြေဆိုခြင်းမပြုနိုင်လိုက်သည့် အဝင်ခေါ်ဆိုမှု စာတိုများပြည့်လျှံတက်လာသည်။ ဧရာဝတီသတင်းဋ္ဌာနကလည်း ထိတ်လန့်တုန်လှုပ်ဖွယ်ရာ ခေါင်းကြီးပိုင်း သတင်းကိုရှေ့မျက်နှာစာတွင်ဖော်ပြထားသည်- “မြန်မာစစ်တပ်အာဏာသိမ်းခြင်း”

    ကျွန်တော့်ဒါရိုက်တာ၊ထောက်ပံ့လှုဒါန်းသူအဖွဲ့အချို့တို့နှင့်အဆက်အသွယ်ရခဲ့သည်။ အခြေအနေကအရေးတကြီး ဖြစ်နေ လေပြီ- ဒါဇင်ပေါင်းများစွာရှိသည့်အရပ်ဖက်လူ့အဖွဲ့အစည်းများ၊တက်ကြွလှုပ်ရှားသူများ နှင့် နိုင်ငံရေးဆိုင်ရာပုဂ္ဂိုလ်အချို့က သူတို့အန္တရာယ်ကျရောက်နေကြောင်းနှင့်အကူအညီလိုကြောင်းကျွန်တော်တို့ဖုန်းထဲသို့စာတိုများလျှံနေအောင်ပို့က သည်။ အကူအညီတောင်းဆိုမှုများအပေါ်ပြန်လည်သုံးသပ်ခြင်း၊အတည်ပြုပေးခြင်းတို့ဆောင်ရွက်ရန် အတွက် ကျွန်တော့် NGO အဖွဲ့အစည်း မှအကူအညီစေလွှတ်ပေးနိုင်ရန်  ထောက်ပံ့လှူဒါန်းသည့်အဖွဲ့တစ်ခုနှင့်အတူကော်မတီတရပ်ဖွဲ့စည်းဖို့ ကျွန်တော်သဘောတူလိုက်သည်။ထိုအရေးတကြီးတာဝန်များကိုလုပ်ဆောင်နေရသဖြင့်နာရီလက်တံတွေအကုန်မြန်ခဲ့သည်။

    ကျွန်တော်အလုပ်လုပ်နေစဉ်တွင်ကားများဘတ်စ်ကားများတိုက်အောက်လမ်းထဲဖြတ်မောင်းနေကြသည်။ ဤနေရာကားမြို့လည်ခေါင်၏အစွန်အဖျားဖြစ်ပြီးလမ်းဘေးတလျှောက်လူများရေးကြီးသုတ်ပြာသွားလာနေကြလေသည်။ ရုံးဆင်းချိန် နီးပြီဖြစ်သဖြင့်စိတ်ပူပင်သောကရောက်ခြင်းမျှော်လင့်တောင့်တခြင်းတို့လေထုထဲပျံ့နှံ့နေသည်။ မကြာမီ MRTV ညနေခင်းသတင်းအစီအစဉ်လာသည့်အခါတွင်စစ်တပ်ထိန်းချုပ်မှုအောက်မှရုပ်မြင်သံကြားသတင်းများကအာဏာသိမ်းလိုက်သည့်အကြောင်းအတည်ပြုခဲ့လေသည်။

    နောက်ပိုင်းသီတင်းပတ်များနှင့်လများတွင်ကျွန်တော့်ဖုန်းနှင့်သာအချိန်ကုန်နေတော့သည်၊အထူးသဖြင့်လျှို့ဝှက် စာပို့သည့်နည်းသည်ကျွန်တော်တို့လိုနယ်ပယ်မှလူများအတွက်စံတစ်ခုလိုဖြစ်လာသည်။အကူအညီလိုနေသော ဆန္ဒပြလှုပ်ရှားသူတို့၏ကိစ္စများကိုပိုသုံး သပ်ရန်စောင့်ဆိုင်းနေခဲ့သည်။အများစုမှာ ယင်းတို့မိသားစုဝင်များအပါအဝင် ပုန်းအောင်းရန်နေရာရှာနေသူများနှင့် ဆက်လက် အသက်ရှင်နေထိုင်ရန်ငွေလိုနေသူများဖြစ်သည်။ အချို့မှာထောင်ထဲမှာဖြစ်ပြီး ရှေ့နေခကုန်ကျစားရိတ်အတွက် သူတို့၏လုပ်ဖော်ကိုင်ဖက်များက  လျှောက်လွှာတင်ကြသည်။ မြန်မာပြည်တဝှမ်းဆန္ဒထုတ်ဖော်သည့် လူထုအုံကြွမှုကြီးဖြစ်ပေါ်လာသည့်အခါ အဆိုပါ လိုအပ်ချက်များကပိုတိုးလာသည်။ အချို့ကိစ္စများတွင်ထိုသူများမှာရိုက်နှက်ခံရခြင်း သို့မဟုတ် ပစ်သတ်ခံရပြီးဖြစ်နေသည်။ အချို့ကလည်းတိုင်းပြည်မှထွက်ခွာပြေးရန်ကြိုးစားနေခဲ့ကြသည်။ ကျွန်တော်၏နေ့စဉ်အလုပ်မှာ နာမည်ဝှက်များ၊လျို့ဝှက်စကားလုံးများ၊အမှန်အကန်ဟုတ်မဟုတ်အထူးစစ်ဆေးခြင်းတို့သုံးပြီးအကူအညီ ဆိုးဆိုးရွားရွားလိုနေသူများကိုကူညီနေခြင်းနှင့်သာ ပြီးနေတော့သည်။ထိုအရာအားလုံးကိုကြောက်ရွံ့ထိတ်လန့်မှုမြင့်မားနေရင်းဖြင့်ပင်လုပ်ဆောင်နေရလေသည်။

    လူ့အခွင့်အရေးဆိုင်ရာ NGO အဖွဲ့အစည်းအနေဖြင့်ဘာဆောင်ရွက်နိုင်ပါသလဲ/နောက်ဆက်တွဲပြဿနာများ

    အာဏာသိမ်းခြင်းသည်လူ့အခွင့်အရေးဆိုင်ရာ NGO အဖွဲ့အစည်းတစ်ရပ်ဆက်လက်တည်ရှိနိုင်ရန်အခက်အခဲများဖြစ် ပေါ်စေသည်။ကျွန်တော့်အဖွဲ့အစည်း၏အနာဂါတ်လုပ်ငန်းအစီအစဉ်များနှင့်ကျွန်တော်တို့၏လုပ်ငန်းဆက်လက်ရှင်သန် ရေးအပေါ်မေးစရာမေးခွန်းများထွက်ပေါ်လာပေသည်။အကြမ်းဖက်မှုများဆိုးသည်ထက်ဆိုးရွားလာသည်နှင့်အမျှ ကျွန် တော်တို့၏လုပ်ငန်းအစီအစဉ်ပိုင်းအများစုကိုအပြောင်းအလဲပြုလုပ်ရန်သီအိုရီမှာလည်းအဓိပ္ဗါယ်မရှိတော့ပေ။သေနပ် ပစ်ဖောက်သံများပေါက်ကွဲသံများကိုလည်းရန်ကုန်မှာညစဉ်လိုလိုကြားနေရသည်။ ရပ်ကွက်တိုင်းတွင်မိမိရပ်ကွက်လုံခြုံ ရေးကင်းတဲများထားရှိကြသည်။ လူမှုကွန်ယက်စာမျက်နှာများကလည်းနေ့စဉ်ထိတ်လန့်စရာပုံများတင်ပြနေသည်။ ဆန္ဒထုတ်ဖော်သူများကိုနှိမ်နင်းရာတွင်မနက်လင်းချိန် သေသူ၏အလောင်းကိုပစ်ထားခဲ့ပြီးညအချိန်တွင်သေနပ်ကိုင်သူများကဆန္ဒပြလှုပ်ရှားသူများကိုလာရောက်ခေါ်ဆောင်သွားကြသည်။မနက်၂နာရီနောက်ပိုင်းမှစပြီးအင်တာနက်နှင့်ဖုန်းကိုပိတ်ထားခံရသဖြင့်မည်သူမျှကိုယ့်ကိုသတိမပေးနိုင်သလိုမည်သူ့ကိုမျှလည်းအကူအညီမတောင်းနိုင်ပေ။ကျွန်တော့်အလုပ်တွင်လူထုပညာပေးသင်တန်းများလည်းမရှိတော့၊အစိုးရအဖွဲ့နှင့်အစည်းအဝေးများလည်းမရှိတော့၊လူ့အခွင့်အရေးနှင့်ပတ်သက်သည့်ကာကွယ်ပြောဆိုသည့်စည်းရုံးလှုပ်ရှားမှု့များလည်းမရှိတော့ပေ။

    ကျွန်တော်တို့လုပ်နိုင်သည့်အလုပ်မှာလည်းကျင့်ဝတ်ညီမညီဆိုသည်ကိုမေးခွန်းထုတ်ရပေမည်။ကျွန်တော်တို့၏ဝန်ထမ်းများ၊မိတ်ဖက်အဖွဲ့အစည်းများနှင့်အကျိုးခံစားခွင့်ရှိသူများအတွက်မည်သည့်အချိန်ကာလတွင်တာဝန်မယူနိုင်လောက်အောင်အန္တရာယ်ရှိလာမည်နည်း ကျွန်တော်တို့အဖွဲ့အစည်းအတွင်းတွင်လည်းအခွင့်အရေးနှင့်ရှေ့လုပ်ငန်းစဉ်များအတွက်တာဝန်ယူမှုဆိုင်ရာရောထွေးနေသည့်ခံစားချက်များရှိနေသည်။ ကျွန်တော်တို့သည်အစိုးရမဟုတ်သောအဖွဲ့အစည်း NGO မှဝန်ထမ်းများ သာဖြစ်ပါသည်၊စစ်သားများမဟုတ်ပါ။ တစုံတယောက်ကအန္တရာယ်ရှိသောတာဝန်ပေးချက်တစ်ခုကိုဆောင်ရွက်ရန်လိုလားသည်ဆိုစေဦးတော့ ကျွန်တော် တို့ကထိုသူများကိုလုပ်ဆောင်စေသင့်ပါသလား ယခုအခြေအနေတွင် ကျိုးကြောင်း ဆီလျော်သည့်စွန့်စားလုပ်ဆောင်ခြင်း၏စံသတ်မှတ်မှုကဘာတွေလဲ တဖြေးဖြေးနှင့်အချို့ဝန်ထမ်းများအလုပ်မှနှုတ်ထွက် လိုက်ကြသည်။ မည်သူမျှကောင်းကောင်းအိပ်မပျော်တော့ချေ။

    ထို့အပြင် ငွေရေးကြေးရေးကြောင့်ကျွန်တော်တို့ လုပ်ဆောင်ရ သည် များမှာပို ၍ခက်ခဲလာသည်။ ဝန်ထမ်းများ၏ အမိန့် မနာခံရေးအာဏာဖီဆန်ရေးလှုပ်ရှားမှုများကြောင့် ဘဏ်အများစုမှာလည်းပိတ်ထားကြသည်။ ထိုမျှမက မှတ်ပုံတင်ထား သည့်NGO တစ်ခုအနေဖြင့် တရားဝင်ဖွင့်ထားသည့်ဘဏ်စာရင်းမှ ငွေထုတ်ခြင်းနှင့်လွှဲပြောင်းခြင်းလုပ်ရန်မှာအန္တရာယ် ရှိသည်။ အခြားလမ်းကြောင်း နှင့် နည်းလမ်း သုံး ၍ ကျွန်တော်တို့၏ရံပုံငွေကိုရွှေ့ပြောင်းရန်နှင့်စီမံခန့်ခွဲရန်လျို့ဝှက် အစီအစဉ်ချသော်လည်း အကြမ်းဖက်မှုများအရှိန်မြင့်လာသဖြင့်ထိုအစီအစဉ်မှာပြန်လည်စစ်ဆေးပြီးဖျက်သိမ်းလိုက် ရသည့်ဘဝရောက်သွားသည်။ကျွန်တော်တို့၏အခြားအစီအစဉ်အတွက်ထောက်ပံ့လှူဒါန်းသူအဖွဲ့အစည်းမှခွင့်ပြုချက်ကို စောင့်ဆိုင်းနေစဉ်တွင် အခြေအနေကပြောင်းသွားပြီး အားစိုက်စီစဉ်ခဲ့သမျှအားလုံး အဟောသိကံဖြစ်သွားရတော့သည်။ ဒုက္ခပိုရောက်စေသည်က မြန်မာပြည်ပြင်ပမှကျွန်တော်တို့ကိုလှူဒါန်းထောက်ပံ့နေသည့်အဖွဲ့အစည်းများထံမှငွေကြေးကိုလက်ခံနိုင်ရန်နည်းလမ်းမရှိခြင်းပင်ဖြစ်သည်။ဖေဖေါ်ဝါရီလအတွင်းကျွန်တော်တို့ထံသို့လွှဲပြောင်းခိုင်းထားသည့်ငွေမှာလည်း ဘဏ်တွင်သောင်တင်ပြီးထုတ်မရသဖြင့်အကြပ်ရိုက်နေသည်။အကယ်၍ ဤ အခြေအနေကိုမဖြေရှင်းနိုင်လျှင်ကျွန်တော်တို့တဖြေးဖြေးငွေပြတ်လပ်သွားပေမည်။

    ပြည်တွင်းတွင်ရုံးခန်းရှိသည့်လှူဒါန်းထောက်ပံ့သူများထံမှငွေချေးရန်စတင်ပြောဆိုကြည့်သေးသည်-သို့သော်အချီးနှီးသာဖြစ်သည်။ဘဏ်လုပ်ငန်းများတဖြေးဖြေးပြန်လည်ပတ်လာသည၊်သို့သော် ကြိုတင်ရက်ချိန်းယူရမည် သို့မဟုတ် အင် မတန်ရှားရှားပါးပါးရခဲလှသည့် တန်းစီစောင့်ဆိုင်းရန်နံပါတ်စဉ် ရယူရန်ဖြစ်သည်။ထို့နောက်၊အစိုးရမဟုတ်သည့်အဖွဲ့အစည်း NGO များဘဏ်မှငွေထုတ်လျှင်ဗဟိုဘဏ်သို့ ဘဏ်များ မှ အကြောင်းကြားရန်နှင့် ဗဟိုဘဏ်၏ ခွင့်ပြုချက်တောင်းခံရန် ဗဟိုဘဏ်မှအမိန့်ကြေငြာချက်ထုတ်ပြန်သည်။ သတင်းမီဒီယာအဖွဲ့အစည်းများ နှင့်အခြားအစိုးရမဟုတ်သည့်အဖွဲ့အစည်းများ ကို ဝင်ရောက်စီးနင်းခံရပြီးသည့်အချိန်တွင်ကျွန်တော်တို့၏တရားဝင်စာရွက်စာတမ်းများနှင့်ဘဏ်သွားပြီးငွေထုတ်ရန်မှာအန္တရာယ်များလွန်းလှသည်။ထို့အပြင်ကျွန်တော်တို့ကိုလှူဒါန်းထောက်ပံ့နေသည့်အလှူရှင်များသတ်မှတ်ထားသည့်ငွေကြေးဆိုင်ရာစည်းမျဉ်းစည်းကမ်းလိုအပ်ချက်များကိုလိုက်နာပြီးကိုယ့်လုပ်ငန်းများဆောင်ရွက်ရန်မှာလည်းအန္တရာယ်များသည့်လက်တွေ့မဆန်မှု့ဖြစ်သည်။

    အလွမ်းအသောဇတ် တွင် ချိတ်ဆက်မှု မရှိခြင်း/အနာဂါတ်

    ကျွန်တော်တို့၏အလှူရှင်များအပါအဝင် လူတိုင်းလူတိုင်းကအခြေအနေကိုလိုက်လျောညီထွေဖြစ်အောင်နေ နေရသည်။ NGO လောက တွင် အလှူရှင်များ၏ငွေကြေးထောက်ပံ့မှုဆိုသည်မှာ စီမံကိန်း ရေးဆွဲထားချက်များအပေါ် ကန့်သတ်ထားပြီး၊ အတိအကျပြန်လည်သတင်းပို့တင်ပြရန်တာဝန်ကလည်း ပူးတွဲပါနေပြန်သည်။ အစီအစဉ်ရေးဆွဲချက်များကိုပြောင်းခြင်း၊ သို့မဟုတ်ချွင်းချက်အဖြစ်ကင်းလွတ်ခွင့်တောင်းခံခြင်းတို့မှာရုံးပိုင်းဆိုင်ရာအရအလွန်ပင်ပမ်းလက်ဝင်ပြီး အကျိုး အကြောင်းခိုင်လုံအောင်တင်ပြချက်မြောက်မြားစွာလိုအပ်လေသည်။ အာဏာသိမ်းပြီးသည့်နောက်ပိုင်း အလျင်အမြန်ပြောင်းလဲနေသော ကျွန်တော်တို့၏ လိုအပ်ချက်များကိုအလှူရှင်အဖွဲ့အစည်းများတုန့်ပြန်ပုံမှာလည်း အလွန် ပြောင်းလွယ်ပြင်လွယ် နှင့် နားလည်မှုရှိသလို၊ကျွန်တော်တို့တောင်းခံချက်များကိုခွင့်ပြုရန် မသေချာမရေရာ သို့မဟုတ် လိုလားပုံမရ သည် အထိအမျိုးမျိုးကွာခြားလေသည်။ ယခင်ကိစ္စရပ်တစ်ခုတွင်- အမြန်ခွင့်ပြုချက်ပေးသည်ဆိုသည့်အဓိပ္ဗါယ်မှာကျွန်တော်တို့လက်ထဲရှိသည့်ငွေကို မိမိတို့ဝန်ထမ်းများလုံခြုံဘေးကင်းရာနေရာသို့ရွှေ့ပြောင်းပေးရန်သုံးစွဲနိုင်ပြီးကျွန်တော်တို့အရေးတကြီးလိုအပ်နေသည့်ပစ္စည်းကရိယာများလည်းဝယ်ယူနိုင်သည်။နိုင်ငံတဝှမ်းအာဏာသိမ်းမှု့ကိုဆန့်ကျင်နေသောမိတ်ဖက်များ၊ထိခိုက်ခံစားနေသည့်အသိုင်းအဝိုင်းကိုငွေကြေးဆိုင်ရာအထောက်အပံ့ပေးဝေနိုင်ခြင်းအဓိပ္ဗါယ်လည်း ဖြစ်နိုင်သည်။ နောက်ကိစ္စတစ်ခုတွင်မူ -အပြောင်းအလဲအတွက် လှူဒါန်းသူများ ထံ တောင်းခံထားချက်ကို သူတို့၏ သက်ဆိုင်ရာ ဋ္ဌာနချုပ် မှဆွေးနွေးပြီး မူလလှူဒါန်းနေသူများကဖြည့်ဆည်းခိုင်းသည့်တာဝန်များ ဖြေလျှော့နေရ၍ အဖြေမပေးပဲ သီတင်း ပတ်များစွာ ကြာမြင့်ကောင်းကြာမည်။ အကြောင်းမှာ မြန်မာနိုင်ငံတွင် NGOများကိုငွေကြေးထောက်ပံ့နေသည့် အလှူရှင် အဖွဲ့အစည်းများကိုယ်တိုင်ကလည်း NGO သို့မဟုတ် နိုင်ငံတကာအစိုးရမဟုတ်သည့်အဖွဲ့အစည်း INGO ဖြစ်နေတတ်ပြီး တိုင်းပြည်အလိုက်လှူဒါန်းထောက်ပံ့သည့်အလှူရှင်၊နိုင်ငံတကာအဖွဲ့အစည်း သို့မဟုတ် ပုဂ္ဂလိက ပရဟိတများ နှင့် မြန်မာ ပြည်တွင်းအဖွဲ့အစည်းများဟုဆိုသည့် မူလအလှူရှင်နှင့်ကြားခံဆက်သွယ်ပေးသည့် အဖွဲ့များဖြစ်သည်။

    ယင်းမှတဆင့်အခွင့်အရေးများစွာဆုံးရှုံးမှု့ကိုဖြစ်ပေါ်စေသည်။ ကျွန်တော်တို့NGO မှလုပ်ငန်းများကွင်းဆင်းဆောင်ရွက်ရန် မြေပြင်အခြေအနေအတော်အတန်လုံခြုံစိတ်ချရသည့်အထိစောင့်ခဲ့ရသည်။အလှူရှင်ထံမှခွင့်ပြုချက်ကြာမြင့်လျှင်ကျွန်တော်တို့နှင့်တွဲဖက်အကောင်အထည်ဖော်လုပ်ကိုင်မည့်သူများလည်းရဲနှင့်စစ်သားကိုရှောင်ကွင်းပြီးအချိန်စောင့်ရမည်ဖြစ်သည်။ လုပ်ဆောင်ရန်အခွင့်ကောင်းပေါ်ပေါက်လာပါလျက်စီမံကိန်းအပြောင်းအလဲကိုတောင်းခံတင်ပြချက်မှာခွင့်ပြုမိန့်ကျရန်စောင့်နေရသည်နှင့်ပင်လုပ်ငန်းတွင်ပါဝင်ပတ်သက်သူအားလုံးလည်းအကြီးအကျယ်စိတ်ပျက်လက်ပျက်ဖြစ်ကုန်ကြသည်။

    ကျွန်တော့်အမြင်တွင် မြန်မာပြည်၏အခြေအနေသည်ငွေကြေးထောက်ပံ့သူမှတုန့်ပြန်အဖြေပေးနိုင်သည့်အခြေအနေထက်ပိုလျင်မြန်စွာပျက်စီးယိုယွင်းနေသဖြင့် ကျွန်တော့်NGOကဲ့သို့အဖွဲ့အစည်းများရပ်တည်နိုင်ရန်မနည်းကုပ်တွယ်နေရသည်။ အလှူရှင်များမှခက်ခဲသည့်ဆုံးဖြတ်ချက်များချနေရသည်ကိုကျွန်တော်သိသော်လည်းဒုက္ခပေါင်းစုံခါးစည်းခံနေရသည်မှာပြည်တွင်းNGO များပင်ဖြစ်သည်။ အလှူရှင်များထံမှ ခွင့်ပြုချက်စောင့်ဆိုင်းနေရစဉ်အတွင်း ကျွန်တော်တို့လုပ်ငန်းများတစ်စစီပြိုကွဲပြီး ကျွန်တော်တို့၏လုံခြုံရေးမှာလည်းအန္တရာယ်ရှိလာသည်။ နိုင်ငံတကာအစိုးရမဟုတ်သောအဖွဲ့အစည်းများနှင့်မတူသည့်အတွက် ပြည်ပတွင်ထောက်ပံ့သည့် နောက်ထပ်အလွှာများနှင့်ဋ္ဌာနချုပ်ကျွန်တော်တို့မှာမရှိပေ။ မိမိ ဖာသာရပ်တည်နေရပြီးNGO တစ်ခုအနေဖြင့်ကျွန်တော်တို့လုပ်ငန်းကိုဆက်လက်ထိန်းသိမ်းထားရန်မှာအလွန်စွန့်စားရသည်။ ဝန်ထမ်းတစ်ဦးအတွက်လုံခြုံစိတ်ချရသည့်ပုန်းအောင်းရန်အိမ်တအိမ်တွင်နေရာတနေရာရဖို့အရေးဟိုဟိုသည်သည်အပူတပြင်းလိုက်လံဖုန်းဆက်မေးမြန်းရသည်များကိုကျွန်တော်ဘယ်တော့မှမေ့မည်မဟုတ်သလို၊တဖက်တွင်လည်းလုံခြုံမှုမရှိလွန်း၍ မသုံးဖြစ်သောရုံးခန်းငှားခအတွက် ငွေကိုပြန်မပေးနိုင်သေးကြောင်း နိုင်ငံတကာအလှူရှင်ကိုရှင်းပြနေ ရသေးသည်။

    ပြဿနာက အလှူရှင်များမှ အလုပ်ကို လုပ်ရိုးလုပ်စဉ်အတိုင်းဆောင်ရွက်ရန်ကြိုးစားနေကြခြင်းနှင့်မြေပြင်ပေါ်မှပကတိအမှန်တရားတို့အကြား အလွမ်းအသောဇတ်၏ချိတ်ဆက်မှု မရှိ ခြင်းဖြစ်သည်။ ဖေဖေါ်ဝါရီ ၁ ရက်နေ့အာဏာသိမ်းမှု၏နောက်ဆက်တွဲအကျိုးဆက်များကိုမြန်မြန်ဆန်ဆန်ပြောင်းပြန်လှည့်၍ မရ သည်မှာအမှန်တရားဖြစ်သည်။သွေးမြေကျရသည်မှာများလှပေပြီ၊ မြန်မာနိုင်ငံ၏ဒီမိုကရေစီကူးပြောင်းရေးကာလအတွင်းတည်ဆောက်ထားရှိခဲ့သောသိမ်မွေ့သည့်လူမှုကတိကဝတ်သည်လည်းအစိတ်စိတ်အမွှာအမွှာဖြစ်ရလေပြီ။ လုံးဝဥဿုံမပြည့်စုံသော်လည်း မြန်မာနိုင်ငံ၏၂၀၁၁မှ၂၀၂၀ အတွင်း ဟန်ဆောင်ဒီမိုကရေစီကာလများသည်အရပ်ဖက်လူ့အဖွဲ့အစည်းများအတွက်အလုပ်တွေလုပ်ရန်အခြေခံအုဌ်မြစ်ဖြစ်ခဲ့သည် ။ ဖွံ့ဖြိုးတိုးတက်ရေးစီမံကိန်းများနှင့်ရင်းနှီးမြုပ်နှံမှုဆိုင်ရာဆုံးဖြတ်ချက်များစွာချမှတ်ရာမြေဖြစ်ခဲ့သည်။ ထိုမြေသည်ယခုအခါခြေသုတ်ဖုံဖြစ်သွားခဲ့ပြီးကျွန်တော်တို့၏ခြေဖဝါးအောက်မှဆွဲထုတ်ခံလိုက်ရပြီဖြစ်သည်။

    စာကြွင်း/၁၂လကြာသောအခါ

    အာဏာသိမ်းပြီး ၁၂လကြာသောအခါ ဝန်ထမ်းဦးရေတဝက်ခန့်အလုပ်ထွက်သွားကြသည်။အချို့ဝန်ထမ်းများကသူတို့လုံခြုံရေးကိုစိုးရိမ်သဖြင့်ထွက်သွားသလိုအချို့ကလက်နက်ကိုင်တော်လှန်ရေးလုပ်ရန်ပူးပေါင်းကြသည်၊အချို့ကနယ်စပ်ကိုဖြတ်ကျော်ပြီးထွက်ပြေးကြသည်၊အချို့ကထမ်းဆောင်ရန်ဘာတာဝန်မှမရှိတော့ပေ။ အလုပ်လုပ်ရန်ကျန်နေသည့်ဝန်ထမ်းများမှာလည်း တော်လှန်ရေးကိုထောက်ခံရန်တွန်းအားနှင့် အလုပ်များလွန်းပြီးစိတ်ဖိစီးမှု့ကြောင့်ခြေကုန်လက်ပမ်းကျနေသူများ၊မိသားစုအတွက်ဖြစ်စေ အခြားရွေးချယ်စရာလမ်းမရှိသဖြင့် အတတ်နိုင်ဆုံး ပုံမှန်အနေအထားအတိုင်းဆက်သွားနိုင်အောင်ကြိုးစား နေကြသူများဖြစ်သည်။

    အခက်အခဲစိမ်ခေါ်မှုများရှိသော်လည်းကျွန်တော်တို့၏အလှုရှင်များကကျွန်တော်တို့ကိုပစ်ပယ်မသွားကြပါ။အာဏာသိမ်းပြီးလများအတွင်းအောက်ခြေတွင်အရေးတကြီးဆောင်ရွက်ရန်လိုနေချိန်တွင်ကျွန်တော်တို့ကိုငွေကြေးထောက်ပံ့သည့်အကြောင်း အရာကိုကြီးကြပ်သည်မှာလိုက်လျောညီထွေဖြစ်ဖို့နှေးကွေးနေသည်။  စီမံကိန်းဆိုင်ရာစာရွက်စာတမ်းများကို သိမ်းဆည်းရခြင်း၊ မှန်ကန်ကြောင်းလက်မှတ်ရေးထိုးစေရခြင်း၊ အဖွဲ့အစည်း၏ဘဏ်စာရင်းကိုသာအသုံးပြုရခြင်းတို့သည် နိုင်ငံတကာဖွံ့ဖြိုးရေးရံပုံငွေကိုကိုင်တွယ်သုံးစွဲရာတွင်စံလိုအပ်ချက်များထဲမှတချို့သာဖြစ်သည်။ ကျွန်တော်တို့၏အလှူရှင်များမှနားလည်သဘောပေါက်ရန်အချိန်လိုအပ်ပြီးကျွန်တော်တို့လုပ်ကိုင်နေရသည့်အခြေအနေကိုလက်ခံဖို့လိုသည်။အလှူရှင်များထံမှယုံကြည်မှု့နှင့် ကျွန်တော်တို့စီမံကိန်းကိုကိုင်တွယ်ရာတွင်ကျွမ်းကျင်မှုတို့မှာ ကျွန်တော်တို့အတူတွဲလုပ်ဆောင်ရာတွင်မရှိမဖြစ်လိုအပ်ချက်များဖြစ်သည်။ အထူးကျေးဇူးတင်ထိုက်သူများမှာ-လုပ်ရည်ကိုင်ရည်အစွမ်းကုန်ပြည့်ဝပြီး ပုန်းအောင်းရာအိမ်များနှင့်ရပ်ဝေးဒေသတို့မှအလုပ်လုပ်ပေးနေသည့်ကျွန်တော်တို့၏ဝန်ထမ်းများဖြစ်သည်၊ထို့အတူ-လိုအပ်သည့်နေရာသို့ငွေကြေးရောက်အောင်ပို့ပေးကြသူများနှင့် ထိုလုပ်ရပ်ကိုလည်းချိတ်ဆက်မှုရှိရှိလုပ်ဆောင်သွားသည့်မိတ်ဖက်များ- အဖွဲ့အစည်း၊ကွန်ယက်များနှင့် ပုဂ္ဂိုလ်တစ်ဦးချင်း-သည်လည်းကျေးဇူးတင်ထိုက်သူများဖြစ်ပါသည်။

    ၂၀၂၁ တွင်ဆက်လက်ရှင်သန်ရပ်တည်နိုင်ခဲ့သဖြင့် မျှော်လင့်စရာအကြောင်းတစ်ခုတော့ ရှိပေသည်။ “လှိုင်းကြီး လှေအောက်၊ တောင်ကြီးဖဝါးအောက်” ဆိုသည့် မြန်မာစကားပုံတစ်ခုလိုပင်။

    Damien Riley သည်မြန်မာနိုင်ငံတွင်းရှိလူ့အခွင့်အရေးဆိုင်ရာအဖွဲ့အစည်းမှနိုင်ငံခြားသား  NGO ဝန်ထမ်းတစ်ဦးဖြစ်ခဲ့ပါသည်။ ရန်ကုန်တွင် ၂၀၁၆ ဧပြီမှ ၂၀၂၁ခုဧပြီအထိနေထိုင်ခဲ့ပါသည်။

    ဤဆောင်းပါးကို လဘက်ရည်ဝိုင်းဘာသာပြန်အဖွဲ့မှမြန်မာဘာသာသို့ပြန်ဆိုပါသည်။